İspaniyanın Barselona şəhərində yerləşən Val-d'Ebron Universitet Klinikası tibb tarixində inqilabi bir əməliyyata imza ataraq evtanaziya tətbiq edilmiş donordan alınan üzün transplantasiyasını uğurla reallaşdırıb.

Postxronika.az xəbər verir ki, "Euronews" telekanalının yaydığı bu məlumat dünya təbabətində mühüm mərhələ kimi qiymətləndirilir. Təxminən yüz mütəxəssisdən ibarət geniş tibbi komandanın icra etdiyi bu prosedur rekonstruktiv cərrahiyyə sahəsində yeni perspektivlər açır.

​Mürəkkəb əməliyyat infeksiya nəticəsində üz toxumalarında ağır nekroz yaranmış və həyati funksiyaları məhdudlaşmış pasiyent üzərində aparılıb. Xəstənin nəfəs alma, qidalanma və danışıq qabiliyyətinə ciddi təsir göstərən bu vəziyyət transplantasiya sayəsində qismən bərpa olunub. Mütəxəssislər bu nailiyyətin kompleks transplantasiya sahəsində beynəlxalq əhəmiyyətə malik olduğunu vurğulayırlar. Hazırda pasiyentin funksional reabilitasiya prosesinə başlanılıb və əməliyyat uğurlu nəticə kimi tarixə düşüb.