Yeni çıxacaq animasiya filmi 1 may tarixində kinoteatrlarda göstəriləcək və yay kino mövsümünün ilk böyük layihələrindən biri olacaq. Layihəni ''Crunchyroll'' və ''Sony'' təqdim edir. Bildirilir ki, ekran işi film seriyasının ikinci hissəsi olsa da, birbaşa davam filmi deyil və ayrıca müstəqil hekayə kimi təqdim edilir. Süjet ''That Time I Got Reincarnated' as a Slime'' serialının üçüncü mövsümündən sonrakı hadisələri əhatə edir. Əsər fantastik dünyada yenidən doğularaq güclü varlığa çevrilən Rimuru Tempestin macəralarını davam etdirir və onun qurduğu dünyanı yeni sınaqlarla üz-üzə qoyur.

Postxronika.az xəbər verir ki, serialın bütün mövsümləri hazırda platformada izlənilə bilir, dördüncü mövsüm isə 3 aprel 2026-da yayımlanacaq. Layihə çoxsatılan manqa və yüngül roman seriyası əsasında hazırlanıb və bu franşiza dünya üzrə milyonlarla nüsxə satışı ilə tanınır. Bundan əvvəl təqdim olunan ''That Time I Got Reincarnated as a Slime the Movie: Scarlet Bond'' da müstəqil hekayə kimi ekranlara çıxmışdı. Həmin film beynəlxalq bazarda uğurlu kommersiya nəticələri əldə etmişdi. Yeni ekran işinin də franşizanın populyarlığını daha da artıracağı gözlənilir.