Aktrisa Kristina Eplgeyt 2004-cü ildə premyera olan ''Anchorman: The Legend of Ron Burgundy'' filminin çəkilişləri zamanı yaşadığı maaş məsələsindən bəhs edib. O bildirib ki, studiya əvvəlcə ona kişi həmkarları ilə müqayisədə xeyli aşağı məbləğ təklif edib. Aktrisa bu təklifi “təhqiredici” hesab etdiyini və öz dəyərini bildiyi üçün razılaşmadığını deyib.

Postxronika.az xəbər verir ki, Eplgeyt bu barədə ''The View'' verilişində danışıb. Onun sözlərinə görə, filmin rejissoru Adam MekKey və baş rol ifaçısı Uill Ferrell vəziyyəti dəyişmək üçün öz maaşlarının bir hissəsini ona verməyə qərar veriblər. Aktrisa bildirib ki, bu addım sayəsində layihədə iştirak edə bilib və həmin film karyerasının ən dəyərli təcrübələrindən birinə çevrilib.

Eplgeyt qeyd edib ki, filmin çəkilişləri zamanı improvizasiya üsulu onun üçün əvvəlcə çətin olub. Rejissor tez-tez ondan səhnələrdə sərbəst davranmağı istəsə də, aktrisa əvvəlcə yalnız yazılmış dialoqları demək istədiyini etiraf edib. Lakin sonradan bu metodun komediya səhnələrinə xüsusi dinamika qatdığını anlayıb. 1970-ci illərdə baş verən hadisələrdən bəhs edən film San Dieqonun məşhur xəbər aparıcısı Ron Burqundi ilə ambisiyalı aparıcı Veronika Korninqstoun arasındakı rəqabəti göstərir. Filmdə həmçinin Stiv Karell və Pol Rudd kimi aktyorlar da rol alıblar. Layihənin davamı olan ''Anchorman 2: The Legend Continues'' 2013-cü ildə ekranlara çıxıb.