ABŞ və İsrailin iştirakı ilə Yaxın Şərqdə kəskinləşən hərbi münaqişə qlobal iqtisadi şok ehtimalı yaradaraq dünya fond bazarlarında kütləvi ucuzlaşmaya səbəb olub. İranın strateji əhəmiyyətli Hörmüz boğazını bağlaması tədarük zəncirini qıraraq neftin barel qiymətinin 115 dollara qədər yüksəlməsi ilə nəticələnib. Yaranmış bu mürəkkəb vəziyyət iqtisadi durğunluq və yüksək inflyasiyanın eyni anda müşahidə edildiyi staqflyasiya qorxusunu daha da artırır.

Postxronika.az xəbər verir ki, analitiklərin qənaətinə görə, enerji daşıyıcılarının davamlı bahalaşması qlobal miqyasda istehlak mallarının qiymətini kəskin qaldıracaq. Ekspertlər xəbərdarlıq edirlər ki, hərbi toqquşmalar qısa müddətdə dayandırılmazsa, dünya iqtisadiyyatında tənəzzül riski qaçılmaz olacaq. Böhranın üç ayadək uzanacağı təqdirdə, "qara qızıl"ın qiymətinin 185 dollara çatması beynəlxalq bazarlar üçün çox ağır fəsadlar vəd edir.