"Unifrance" təşkilatının rəhbəri Daniela Elstner fransalı məşhur sənətçi Patrik Bruel haqqında polisə şikayət edib. İddia 1997-ci ildə baş vermiş xoşagəlməz hadisə ilə bağlıdır.

Postxronika.az xəbər verir ki, nüfuzlu araşdırma portalı "Mediapart" sənətçini oxşar hərəkətlərdə günahlandıran səkkiz qadından birinin Elstner olduğunu bildirib. Meksikada keçirilən festival zamanı baş verdiyi iddia edilən bu hadisə ilə yanaşı, başqa bir qadın da 2012-ci ildə Bruelin ona qarşı zorakılıq etdiyini iddia edərək hüquqi addım atıb. Şikayətçinin sözlərinə görə, həmin vaxt o, agentlikdə cəmi 26 yaşında olub və köməkçi vəzifəsində çalışırmış.

Elstner sənətçinin ona avtomobildə fiziki təzyiq göstərdiyini və etirazlarını nəzərə almadığını qeyd edib. Aktyorun həmin an dediyi "Kimsə sənə inanmayacaq, sən heç kimsən" ifadəsi zərərçəkmişin mənəvi durumuna ciddi mənfi təsir göstərib. O, bu kəlmələrin fiziki hücum qədər ağır olduğunu və illərdir unuda bilmədiyini vurğulayıb. Hazırda hüquq-mühafizə orqanları daxil olan müraciətlər əsasında müvafiq araşdırmalar aparır.