Qorxu filminin davamı olan "Ready Or Not 2: Here I Come" ekran işinin ilk detalları məlum olub. Rejissorlar Mett Bettinelli-Olpin və Tayler Cillit bu dəfə orijinal ulduz Samara Vivinqi Ketrin Nyuton və əfsanəvi Sara Mişel Gellarla bir araya gətiriblər. Ekran əsəri amansız elita tərəfindən təqib edilən bacıların sağ qalma mübarizəsindən bəhs edir.

Postxronika.az xəbər verir ki, çəkiliş zamanı "Baffi" serialı ilə tanınan Sara Mişel Gelların zəngin təcrübəsi yaradıcı heyət üçün maraqlı çətinliklər yaradıb. Rejissorlar bildiriblər ki, aktrisa karyerası boyu demək olar ki, bütün silahlardan istifadə etdiyi üçün ona fərqli vəsaitlər tapmaq lazım gəlib. Hətta əvvəlki obrazlarında arbalet və raketatanla işlədiyini xatırladan ulduz üçün daha mürəkkəb və partlayıcı səhnələr hazırlanıb. Filmin heyətinə Devid Kronenberq və Elayca Vud kimi tanınmış simaların da qatılması layihəyə olan marağı artırır.

"Scream" və "Abigail" kimi uğurlu layihələrin müəllifləri əfsanəvi aktyorlarla çalışmaqdan məmnunluqlarını ifadə ediblər. Onlar sənət qəhrəmanlarını çəkiliş meydançasında çətin vəziyyətlərə salsalar da, bu əməkdaşlığın dəyərli təcrübə olduğunu vurğulayırlar. Yeni ekran işi qorxu janrının pərəstişkarları üçün yenidən gərgin və həyəcanlı anlar vəd edir.