''Marvel''in "Disney+" platformasında yayımlanan "Wonder Man" serialı ikinci mövsüm üçün rəsmi təsdiqini alıb. Ekran işinin əsas ulduzları növbəti bölümlərdə də öz rollarına sadiq qalacaqlar.
Postxronika.az xəbər verir ki, Yahya Abdul-Matin II və Ben Kinqsli müvafiq olaraq Saymon Vilyams və Trevor Sletteri obrazları ilə geri dönürlər. Layihənin yaradıcıları Destin Daniel Kretton və Endryu Qest də yaradıcı komandadakı yerlərini qoruyub saxlayıblar. Yanvar ayında premyerası olan ekran əsəri tənqidçilər tərəfindən yüksək qiymətləndirilərək reytinqlərdə ön sıralara yüksəlib. ''Marvel'' şirkəti serialın uğurunu nəzərə alaraq, onu mükafat mövsümündə komediya janrı üzrə namizəd göstərməyi planlaşdırır.
Nielsenin məlumatına görə, "Wonder Man" ilk həftəsində 618 milyon dəqiqəlik izlənmə müddəti ilə böyük marağa səbəb olub. Bu, "Loki" və "Daredevil: Born Again" layihələrindən sonra studiyanın ikinci mövsüm şansı qazanan nadir canlı versiyalı seriallarından biridir. Şirkət son illərdə film formatından ənənəvi televiziya modelinə keçid edərək daha geniş auditoriya toplamağa nail olur. Aktyorluq sənətinin pərdəarxası məqamlarını işıqlandıran bu macəra pərəstişkarlar tərəfindən maraqla gözlənilir.