Slovakiya Prezidenti Peter Pelleqrini Azərbaycan Prezidenti İlham Əliyevin rəsmi danışıqları Şuşada aparmaq təklifi ilə dərhal razılaşdığını bildirib.
Postxronika.az xəbər verir ki, bu barədə Slovakiya dövlət başçısı "AnewZ" telekanalına müsahibəsində bildirib.
Azərbaycanda artıq bir neçə dəfə olmasına baxmayaraq, Şuşaya ilk dəfə səfər etdiyini vurğulayan P. Pelleqrini deyib:
"Bu, mənim Şuşaya ilk səfərimdir. İdeya Prezident İlham Əliyevə məxsusdur, o məndən rəsmi qarşılanma mərasiminin və digər bütün əsas tədbirlərin bu dəfə Bakıda deyil, Şuşada keçirilməsinə razı olub-olmayacağımı soruşdu. Və əlbəttə ki, mən dərhal razılaşdım, çünki bu torpağın tarixini bilirəm".
Slovakiya Prezidenti həmçinin qeyd edib ki, o və rəhbərlik etdiyi nümayəndə heyəti şəhərdə aparılan genişmiqyaslı bərpa işlərinə, infrastruktura edilən irimiqyaslı yatırımlara heyran qalıb.
Xatırladaq ki, Slovakiya Prezidenti iyulun 13-dən 15-dək Azərbaycanda rəsmi səfərdə olub.