ABŞ və İran arasında hərbi gərginliyin həftəsonu səngiməsi, neft qiymətlərinin kəskin ucuzlaşması və investorların risk iştahasının artması fonunda iyulun 27-də Avropa səhm bazarlarında təxminən 1%-ə yaxın artım qeydə alınıb.

​Postxronika.az "Reuters"ə istinadən xəbər verir ki, pan-Avropa "STOXX 600" indeksi 0.8% yüksələrək 649.34 bəndə çatıb.

​İranın yüksək rütbəli rəsmisi "Reuters"ə bildirib ki, Vaşinqton hərbi sursat ehtiyatlarının tükənməsi narahatlığı fonunda bombardmanları dayandırdıqdan sonra, Tehran da qarşılıqlı olaraq hücumları dayandıracaq. Bu xəbərin ardından "Brent" markalı neftin fyuçersləri 6% ucuzlaşaraq bir barel üçün 90 dollar civarına düşüb. Energetika və kommunal xidmətlər sektorları ucuzlaşan yeganə sahələr olub.

​Neftin ucuzlaşması xüsusilə aviaşirkətlərin gəlir gözləntilərini artırıb və nəticədə səyahət və istirahət sektoru 2.4% artımla bazarın liderinə çevrilib. "Lufthansa" və "IAG" səhmləri 3.7%, "Ryanair" isə 3.4% dəyər qazanıb. Həmçinin Böyük Britaniyanın "Vodafone" telekommunikasiya şirkəti "Safaricom" müqaviləsindən sonra illik proqnozlarını qaldırdığını açıqladıqdan sonra səhmləri 3.7% artıb.

​Qeyd olunub ki, bu həftə investorların diqqəti həm də ABŞ-nin "Microsoft", "Meta Platforms", "Amazon" və "Apple" kimi texnologiya nəhənglərinin rüblük maliyyə hesabatlarına yönələcək.