Azərbaycanda minik avtomobillərinin sayı artmaqda davam edir və hər 100 ev təsərrüfatına düşən avtomobillərin sayı da yüksəlib.

Postxronika.az xəbər verir ki, Dövlət Statistika Komitəsinin “Azərbaycanda nəqliyyat – 2025” statistik məcmuəsinə əsasən, 2024-cü ilin sonuna ölkədə qeydiyyatda olan minik avtomobillərinin sayı 1 milyon 585 min 265-ə çatıb. Bu, əvvəlki illə müqayisədə 83 min 308 ədəd və ya 5,5 faiz çoxdur. 

Rəsmi statistikaya görə, hər 100 ev təsərrüfatına düşən şəxsi minik avtomobillərinin sayı 65 olub. Bu göstərici əvvəlki illə müqayisədə artım nümayiş etdirir və ölkədə avtomobilləşmə səviyyəsinin yüksəldiyini göstərir.

Statistik məlumatlarda qeyd olunur ki, avtomobil parkının yenilənməsi prosesi davam etsə də, ölkədə istismarda olan nəqliyyat vasitələrinin əhəmiyyətli hissəsini yaşı 10 ildən çox olan avtomobillər təşkil edir. Bununla yanaşı, elektrik və hibrid avtomobillərə maraq da son illərdə artmaqdadır.