Azərbaycan Qida Təhlükəsizliyi İnstitutu (AQTİ) qida təhlükəsizliyi, bitki, heyvan və ictimai sağlamlıq sahələrində gələcəyin mütəxəssislərinin hazırlanmasına yönəlmiş "Vahid Sağlamlıq" Mentorluq Proqramına müraciət qəbuluna başlayıb.

​Postxronika.az xəbər verir ki, 12 həftə davam edəcək proqrama müraciətlər 5–25 avqust tarixlərində qəbul olunur. Təlimlərin 15 sentyabr 2026-cı il tarixində başlaması nəzərdə tutulur.

​Layihənin əsas məqsədi "Vahid Sağlamlıq" (One Health) yanaşmasını təşviq etmək, iştirakçıların nəzəri-praktiki biliklərini artırmaq və sahə üzrə ixtisaslı insan kapitalının formalaşmasına töhfə verməkdir. Qida təhlükəsizliyi, bitki və heyvan sağlamlığı istiqamətlərində təhsil alan şəxslər bu imkandan yararlana bilərlər.

​Müsabiqədən keçən namizədlər AQTİ-nin rəhbər heyəti və aparıcı ekspertlərindən mentorluq dəstəyi alacaq, idarəçilik və elmi yanaşmalar üzrə praktiki təcrübə toplayacaqlar.

​Seçim namizədlərin təhsil göstəriciləri və motivasiya məktublarının ilkin qiymətləndirilməsi, ardından isə müsahibə mərhələsi ilə aparılacaq. Ətraflı məlumat və müraciət üçün [https://afsi.gov.az/az/mentorship](https://afsi.gov.az/az/mentorship) keçidindən istifadə etmək mümkündür.