Səkkiz illik müzakirələrdən sonra Avstraliya və Avropa İttifaqı (Aİ) arasında dəyəri təxminən 10 milyard Avstraliya dolları olan genişmiqyaslı azad ticarət müqaviləsi imzalanıb. Kanberrada əldə olunan bu razılaşma tərəflər arasında demək olar ki, bütün gömrük rüsumlarının ləğvini, həmçinin müdafiə və strateji minerallar sahəsində əməkdaşlığın dərinləşdirilməsini nəzərdə tutur.

Postxronika.az xəbər verir ki, Avropa Komissiyasının prezidenti Ursula fon der Leyen və Avstraliyanın Baş naziri Entoni Albaniz sənədi qlobal ticarət münasibətlərini şaxələndirən və "kollektiv dayanıqlığa" xidmət edən qarşılıqlı faydalı addım kimi qiymətləndiriblər. Təsdiqlənmiş sazişə əsasən, Avstraliyanın əksər kənd təsərrüfatı məhsulları rüsumsuz olaraq Avropa bazarına çıxarılacaq, yerli istehlakçılar isə qitənin mallarını daha ucuz qiymətə əldə edə biləcəklər. Bundan əlavə, sənəd çərçivəsində bəzi ənənəvi qida və içki adlarının istifadəsi ilə bağlı mərhələli keçid dövrü müəyyənləşdirilsə də, ət ixracı üçün ayrılan kvotalar hər iki tərəfin fermerlərinin kəskin narazılığına səbəb olub. Yeni tərəfdaşlıq iqtisadi əlaqələrlə yanaşı, terrorizmə qarşı mübarizə, kosmos və dəniz təhlükəsizliyi kimi istiqamətləri də əhatə edəcək.