Yaxın Şərqdə gərginliyin kəskinləşməsi fonunda Fransa Hərbi Dəniz Qüvvələrinə məxsus "Charles-de-Gaulle" təyyarədaşıyan gəmisi Aralıq dənizi sularına daxil olub. 

Postxronika.az xəbər verir ki, Paris həmçinin gəmidəki üç ədəd "E-2C Hawkeye" radar təyyarəsinin istismar müddətini 2032-ci ilə qədər uzatmaq qərarına gəlib. Planlaşdırılan sonuncu texniki baxış mərhələsindən sonra bu hərbi gəminin 2038-ci ilə qədər operativ vəziyyətdə saxlanılması nəzərdə tutulur. Həmin müddətdən etibarən mövcud gəmi "Naval Group" tərəfindən inşa edilən və dəyəri 12 milyard avronu aşan "France libre" ilə əvəz ediləcək. Yeni gəminin arsenalına modern "E-2D Advanced Hawkeye" radar təyyarələrinin daxil edilməsi də strateji hədəflər arasındadır. Bu addımlar Fransanın regiondakı hərbi mövcudluğunu və müşahidə imkanlarını gücləndirmək məqsədi daşıyır.