Aprelin 11-i və 12-də ölkə ərazisində polis əməkdaşları tərəfindən cinayətkarlığa qarşı mübarizə istiqamətində uğurlu tədbirlər həyata keçirilib.
Daxili İşlər Nazirliyinin (DİN) Mətbuat Xidmətindən Postxronika.az-a verilən məlumata görə, ötən iki gün ərzində qeydə alınan 83 cinayətin, eləcə də əvvəlki dövrlərdən bağlı qalan 6 cinayətin açılması polis tərəfindən təmin edilib. Cinayət törətməkdə şübhəli bilinən 73 nəfər saxlanılaraq istintaqa cəlb olunub.
Həmçinin axtarışda olan şəxslərin tutulması istiqamətində keçirilən tədbirlər nəticəsində ümumilikdə 57 nəfər saxlanılaraq aidiyyəti üzrə təhvil verilib. Onlardan 31-i borclu şəxs qismində axtarışda olanlardır.
Bundan əlavə, narkotik vasitələrin qanunsuz dövriyyəsi ilə bağlı 27 fakt, qanunsuz saxlanılan silah-sursatın götürülməsi və aşkarlanması ilə bağlı isə 5 fakt müəyyən edilib.