İkiqat "Oskar" nominantı Con Pauell "Illumination" studiyasının "Minions & Monsters" adlı yeni animasiya filminin musiqilərini bəstələyəcək. Bu layihə sənətçinin "The Lorax" və "Migration" ekran işlərindən sonra tanınmış studiya ilə növbəti böyük əməkdaşlığıdır. Ekran əsəri sevimli sarı məxluqların Hollivudu fəth etməsi və səhvən sərbəst buraxdıqları canavarlardan dünyanı xilas etmə macəralarını işıqlandıracaq.

Postxronika.az xəbər verir ki, klassik kino sənətinə məhəbbət ruhunda hazırlanan bu film bəstəkara müxtəlif janrları sınaqdan keçirmək imkanı yaradacaq. Animasiyanın rejissoru ilk üç ''Despicable Me'' filmi ilə uğur qazanan Pyer Koffindir. Səsləndirmə heyətində Kristof Valts, Ceff Bricis və Allison Cenni kimi ulduz simalar yer alıb. Ssenari müəllifləri Brayan Linç və Koffin hekayəni həm gülməli, həm də həyəcanlı bir xətt üzərində qurublar. Premyera günü isə artıq cari ilin 1 iyul tarixinə təyin edilib.

Karyerası ərzində "Ice Age" və "Kung-Fu Panda" kimi onlarla animasiyaya musiqi yazan Pauell bu sahədə ən təcrübəli sənətkar hesab olunur. Onun yaradıcılıq üslubu minionların çılğın dünyasına xüsusi dinamika və rəngarənglik qatacaq. Studiya rəhbərliyi bəstəkarın ustalığının filmin atmosferini daha da canlandıracağına əmindir. Beləliklə, yeni ekran işi həm vizual görüntüsü, həm də orijinal səs müşayiəti ilə izləyicilərə fərqli emosiyalar bəxş edəcək.