Prezident İlham Əliyev güləş üzrə Avropa çempionatında qadın idmançıların medal qazanmasını yüksək qiymətləndirib. Dövlət başçısı qızların medalçılar sırasında yer almasının gənc nəsildə bu idman növünə olan böyük marağın göstəricisi olduğunu vurğulayıb.

Postxronika.az xəbər verir ki, bu fikirləri Prezident İlham Əliyev Avropa çempionatında komanda hesabında çempion olan güləşçilər və onların məşqçiləri ilə görüşündə səsləndirib.

Ölkə rəhbəri Azərbaycanda güləşin bütün istiqamətlərinin uğurla inkişaf etdiyini diqqətə çatdıraraq deyib: "Qızlara gəldikdə onların da medalçılar arasında olmalarına çox şadam. Bu, qızlar arasında da gənc nəslin güləşə böyük maraq göstərdiyindən xəbər verir. Əminəm ki, gələcəkdə də qızlar qızıl medal qazanacaqlar, mən buna şübhə etmirəm. Qızlar arasında medalçılar daha çox ola bilərdi, amma kiminsə bəxti gətirmədi. Ola bilər ki, hər hansı səhvlər də oldu, lakin bu mühümdür, çünki həm sərbəst, həm yunan-Roma, həm də qadın güləşi üzrə bütün istiqamətlər Azərbaycanda uğurla inkişaf edir".

Dövlət başçısı həmçinin yığma komandadakı birliyə və müsbət auraya da xüsusi toxunub: "Milli komandada belə yaxşı ab-havanın, ruh yüksəkliyinin olmasına çox şadam, hamı vahid ailə kimi bir-birinin uğuruna, qələbəsinə sevinir və bu, çox qiymətlidir".