Almaniyanın Bonn şəhərində IDEA İctimai Birliyinin təsisçisi və rəhbəri Leyla Əliyeva ilə BMT Baş katibinin müavini, eyni zamanda Təşkilatın Səhralaşma ilə mübarizə üzrə Konvensiyasının (UNCCD) icraçı katibi Yasmin Fuad arasında görüş baş tutub. Dialoq zamanı əsas diqqət Azərbaycanda təbiətin mühafizəsi, torpaq resurslarının optimal idarə olunması və quraqlığa qarşı aparılan mübarizə tədbirlərinə yönəldilib.

Postxronika.az xəbər verir ki, görüş əsnasında IDEA İctimai Birliyinin həm respublika daxilində, həm də geniş regionda ekoloji dayanıqlığın təmin edilməsi və biomüxtəlifliyin qorunması məqsədilə reallaşdırdığı layihələrdən bəhs edilib. İqlim dəyişikliyinin fəsadlarının yumşaldılması, eləcə də torpaq deqradasiyasının qarşısının alınmasında yaşıllıq zolaqlarının artırılmasının, kütləvi ağacəkmə kampaniyalarının və mövcud meşə fondunun mühafizəsinin müstəsna əhəmiyyəti xüsusilə diqqətə çatdırılıb.

Tərəflər arasında aparılan müzakirələrin digər önəmli istiqaməti Xəzər dənizinin səviyyəsinin aşağı düşməsi və bu prosesin yaratdığı qlobal ekoloji, eləcə də sosial-iqtisadi fəsadlar olub. Dənizdə müşahidə edilən bu neqativ dəyişikliklərin sahilyanı ekosistemə, regionun təbiətinə və ümumi ekoloji təhlükəsizliyə təhdidləri dəyərləndirilib. Problemi daha dərindən öyrənmək və müştərək çıxış yolları tapmaq məqsədilə birgə fəaliyyət imkanları nəzərdən keçirilib.

Sonda quraqlıq və səhralaşma kimi təhlükəli proseslərə qarşı preventiv addımların atılmasının vacibliyi bir daha vurğulanıb. Bundan əlavə, IDEA İctimai Birliyi ilə UNCCD qurumu arasında təbiətin qorunması, torpaq deqradasiyasına qarşı mübarizə və cəmiyyətin ekoloji cəhətdən maarifləndirilməsi istiqamətlərində gələcək tərəfdaşlıq perspektivləri ətrafında fikir mübadiləsi aparılıb.