Sakit okeanın temperaturunu tədqiq edən alimlərin son göstəricilərinə əsasən, hazırda formalaşan "El-Ninyo" təbii fenomeni rekord göstəriciyə çatmaqla müşahidələr tarixinin ən dağıdıcı və güclü səviyyəsinə yüksəlib. Okeanın mərkəzi-şərq hissəsində dəniz səthinin gündəlik temperaturunun normadan 3,05°C yüksək qeydə alınması, 2015-ci ildəki 3,02°C-lik əvvəlki tarixi rekordu rəsmi şəkildə geridə qoyub.

"Postxronika.az" BBC-yə istinadən xəbər verir ki, mütəxəssislər iqlim anomaliyasının pik həddinə ilin sonlarına doğru çatacağını proqnozlaşdırdıqları üçün uzunmüddətli göstəricilərin daha da kəskinləşəcəyini gözləyirlər. Böyük Britaniyanın Meteorologiya Xidməti (Met Office) bəyan edib ki, okeandan atmosferə nəhəng istilik axınının paylanması ilə müşayiət olunan bu qlobal proses artıq dünya üzrə hava şəraitində öz kəskin təsirlərini göstərməyə başlayıb.

Hər iki-yeddi ildən bir passat küləklərinin zəifləməsi nəticəsində təkrarlanan və adətən bir il davam edən bu fenomen planet miqyasında anomal istiləşməyə zəmin yaradır. Sakit okeandakı temperatur artımının kritik 0,5°C həddini dəfələrlə üstələməsi bəşəriyyətin yaxın aylarda daha kəskin ekstremal hava şəraiti ilə üz-üzə qalacağını qaçılmaz edir.

Rəşad Hüseynov