ABŞ Prezidenti Donald Tramp BMT Baş Assambleyasında çıxışı zamanı Tehranla aparılan danışıqları hazırda bərpa etmək niyyətində olmadığını bəyan edərək, dünya dövlətlərini İranın tam iqtisadi təcrid olunmasını təmin etməyə çağırıb. Vaşinqtonun güzəştə getməyəcəyini vurğulayan Tramp, yeddi aydır davam edən hərbi münaqişəyə son qoyacaq yekun sazişin yalnız ABŞ-da keçiriləcək aralıq seçkilərdən dərhal sonra əldə olunacağına inandığını diqqətə çatdırıb.

"Postxronika.az" Reuters-ə istinadən xəbər verir ki, İran tərəfi BMT Baş Assambleyasını diplomatiyaya qayıdış üçün "qızıl fürsət" kimi dəyərləndirərək, Vaşinqtonun hərbi təzyiqi azaltması və limanların blokadasını qaldırması müqabilində Hörmüz boğazını gəmiçilik üçün yeddi gün ərzində yenidən aça biləcəyini bəyan edib. İyul ayından bəri birbaşa təmasların kəsildiyi bir vaxtda Dövlət katibi Marko Rubio dialoqa açıq olduqlarını bildirsə də, İran parlamentinin sədri Məhəmməd Baqir Qalibaf Trampın güc tətbiqi yolu ilə ölkəsinə öz iradəsini qəbul etdirə bilməyəcəyini vurğulayıb.

Bununla da, vasitəçilər vasitəsilə Vaşinqtona son təkliflərini çatdıran Tehranın şərtləri ilə Tramp administrasiyasının sərt təcrid mövqeyi arasında fikir ayrılıqları dərinləşməkdə davam edir. BMT tribunasında səslənən bu qarşılıqlı bəyanatlar Yaxın Şərqdə davam edən böhranın həlli istiqamətində diplomatik çıxış yollarının hələ də mürəkkəb olaraq qaldığını göstərir

Rəşad Hüseynov