İnsan hüquqlarının ciddi pozuntusu hesab edilən və BMT tərəfindən qadağan olunan qadın sünnəti məsələsi Qambiyada yenidən gündəmə gələrək ictimai-siyasi gərginliyə səbəb olub.

Postxronika.az xəbər verir ki, ölkədə bu zərərli təcrübəni qadağan edən qanunun ləğvi üçün Ali Məhkəməyə müraciət edilib və bu addım dini-mədəni azadlıqların müdafiəsi kimi qələmə verilir. Tibbi əsası olmayan, steril olmayan şəraitdə və çox vaxt anesteziyasız həyata keçirilən bu prosedur qadınlarda sonsuzluq və ölümlə nəticələnən ağır fəsadlar yaradır. Qambiya qanunvericiliyinə görə cinayətkarları həbs və cərimə gözləsə də, bəzi icma liderləri baş verən ölümləri "Allahın iradəsi" adlandıraraq bu adəti müdafiə edirlər. Beynəlxalq qurumlar və ECOWAS məhkəməsi isə sözügedən əməli "işgəncə" və qadınlara qarşı zorakılığın ən ağır forması kimi qiymətləndirir. Dünya miqyasında qadın hüquqlarına qarşı artan təzyiqlər fonunda, bu qəddar ənənənin ləğvi uğrunda mübarizə qlobal problem olaraq qalır.