ABŞ ordusu Suriyanın şimal-şərqindəki həbsxanalardan 7 minə qədər İŞİD döyüşçüsünü İraqa köçürmək üçün xüsusi əməliyyata başlayıb. 

Postxronika.az “BBC”yə istinadən xəbər verir ki, bu qərar Suriya hökumət qüvvələrinin uzun müddətdir kürdlərin rəhbərlik etdiyi qruplaşmaların nəzarətində olan əraziləri ələ keçirməsi fonunda qəbul edilib.

ABŞ Mərkəzi Komandanlığı artıq Həsəkə vilayətindən 150 məhbusun İraqdakı təhlükəsiz yerə köçürüldüyünü təsdiqləyib. Bildirilib ki, əsas məqsəd ABŞ və regional təhlükəsizliyə birbaşa təhdid yarada biləcək kütləvi həbsxana qaçışlarının qarşısını almaqdır.

Bölgədə vəziyyət gərgin olaraq qalır. Tərəflər Şəddadi həbsxanasından baş verən kütləvi qaçışa görə bir-birini ittiham edirlər. Suriya Daxili İşlər Nazirliyi 120 terrorçunun qaçdığını və onlardan 81-nin tutulduğunu bildirsə də, "Suriya Demokratik Qüvvələri" Dəməşqə bağlı qüvvələrin hücumları nəticəsində 1500-ə yaxın İŞİD üzvünün qaçdığını iddia edir.

ABŞ rəsmiləri isə Vaşinqtonun strategiyasının dəyişdiyini vurğulayırlar. Xüsusi nümayəndə Tom Barrak ABŞ-SDQ tərəfdaşlığının artıq öz aktuallığını itirdiyini və əsas diqqətin məhbusların təhlükəsizliyinə, eləcə də SDQ ilə Prezident Əhməd Şəraa hökuməti arasındakı danışıqlara yönəldiyini bildirib.