Apple uzun müddətdir gözlənilən addımını ataraq "Siri"ni ChatGPT və Google Gemini ilə rəqabət apara biləcək səviyyədə inkişaf etdirməyə hazırlaşır

Postxronika.az xəbər verir ki, “Campos” kod adı ilə həyata keçirilən layihə çərçivəsində "Siri", "Google"un Gemini texnologiyası əsasında qurulan xüsusi Apple modeli ilə təchiz ediləcək. Bu yenilik "Siri"ni sadəcə əmrləri yerinə yetirən köməkçi deyil, dərin məntiq yürütmə və axıcı dialoq qabiliyyəti olan süni intellektə çevirəcək. Yeni "Siri" arxa planda işləyən funksiya əvəzinə Apple cihazlarına inteqrasiya olunmuş müstəqil tətbiq kimi fəaliyyət göstərəcək. 

2026-cı ildə iOS 27, macOS 27 və iPadOS 27 ilə təqdim olunması gözlənilən sistem veb axtarışları, mətn xülasəsi, sənəd analizi, vizual kontent yaradılması və ekran kontekstinin anlaşılması kimi imkanlar təklif edəcək. Bloombergin məlumatına görə, Apple bu yenilikləri WWDC 2026 tədbirində təqdim etməyi planlaşdırır və əsas prioritetlər sürət, məxfilik və cihazdaxili inteqrasiya olacaq.