"Anthropic" ekspertindən xəbərdarlıq: AI sahəsində çalışanlarda bəşəriyyət qorxusu var
RH
"Anthropic" şirkətini tərk edən 27 yaşlı tədqiqatçı Ceykob Kokson süni intellekt üzərində çalışan mütəxəssislərin bu texnologiyanın inkişaf sürətindən və bəşəriyyət üçün yarada biləcəyi nəticələrdən həqiqətən qorxduqlarını bildirib. O, BBC-yə müsahibəsində nəzarətdən çıxan sistemlərin risklərinə diqqət çəkərək, mövcud tempin səngidilməyəcəyi təqdirdə yaxın gələcəkdə qlobal fəlakətin qaçılmaz ola biləcəyini vurğulayıb.
"Postxronika.az" BBC-yə istinadən xəbər verir ki, sənayedə artan bu narahatlıqları "Anthropic" rəhbəri Dario Amodei, habelə "OpenAI" və "xAI" rəhbərləri Sem Altman ilə İlon Mask da bölüşərək, prosesin yavaşladılması və müstəqil nəzarət mexanizmlərinin tətbiqi ilə razılaşdıqlarını bəyan ediblər. Keçmiş mütəxəssis isə texnoloji yarışın qarşısını almaq üçün tənzimləmə addımlarının mütləq Çinlə koordinasiyalı şəkildə atılmalı olduğunu qeyd edib.
Digər tərəfdən, aparıcı dövlətlər və beynəlxalq qurumlar süni intellekt alətlərinin hərbiləşdirilməsinin və kiberhücumlarda istifadəsinin qarşısını almaq üçün vahid təhlükəsizlik standartları üzərində işləyirlər. Mütəxəssislər xəbərdarlıq edirlər ki, tənzimləyici çərçivələrin ləngiməsi rəqəmsal mühitdə geri dönməz risklər yarada bilər. Şirkətlər daxilində də müstəqil monitorinq komissiyalarının yaradılması və etik normativlərin sərtləşdirilməsi təklif olunur. Müvafiq qanunvericilik aktlarının qəbulu isə gələcəkdə qlobal təhlükəsizliyin təmin edilməsində həlledici rol oynayacaq.
Rəşad Hüseynov