Azərbaycan-Vyetnam strateji tərəfdaşlığı əməkdaşlığın genişləndirilməsi üçün mühüm imkanlar yaradır
NQ
Azərbaycan ilə Vyetnam arasında strateji tərəfdaşlığın inkişafı siyasi, iqtisadi və digər sahələrdə əməkdaşlığın genişləndirilməsi üçün yeni imkanlar yaradır.
Postxronika.az AZƏRTAC-a istinadən xəbər verir ki, bunu Milli Məclisin Gənclər və idman komitəsinin sədri Şahin İsmayılov Azərbaycan Prezidenti İlham Əliyevin Vyetnam Xəbər Agentliyinə müsahibəsini şərh edərkən bildirib.
Şahin İsmayılov qeyd edib ki, Azərbaycanın balanslaşdırılmış xarici siyasəti nəticəsində müxtəlif regionlarla əlaqələri genişlənir və Vyetnamla münasibətlərin inkişafı bu baxımdan əhəmiyyətlidir. O, iki ölkə arasında dostluq əlaqələrinin tarixi əsaslarını vurğulayaraq, 1959-cu ildə Ho Şi Minin Bakıya, 1983-cü ildə isə Heydər Əliyevin rəhbərliyi ilə sovet nümayəndə heyətinin Vyetnama səfərinin əməkdaşlığın formalaşmasında mühüm rol oynadığını bildirib.
Komitə sədri 2025-ci ilin mayında Vyetnam Kommunist Partiyasının Baş katibi To Lamın Azərbaycana səfəri və Strateji Tərəfdaşlığın qurulması haqqında Birgə Bəyanatın qəbul edilməsini münasibətlərdə yeni mərhələnin başlanğıcı kimi qiymətləndirib. Onun sözlərinə görə, 2025-ci ildə iki ölkə arasında ticarət dövriyyəsinin 150 milyon ABŞ dollarını ötürməsi əməkdaşlığın potensialını göstərsə də, enerji, sənaye, kənd təsərrüfatı, infrastruktur, investisiya, nəqliyyat və logistika sahələrində imkanlar daha genişdir.
Şahin İsmayılov, həmçinin SOCAR ilə “PetroVietnam” arasında əməkdaşlığın genişləndirilməsinin, birgə layihələrin və biznes əlaqələrinin inkişafının qarşılıqlı iqtisadi maraqlara xidmət edəcəyini vurğulayıb.