Azərbaycanda xarici ticarət və logistika əməliyyatları vahid rəqəmsal platformaya keçirilir
HC
Azərbaycanda idxal, ixrac, tranzit, nəqliyyat və logistika əməliyyatlarının vahid rəqəmsal platforma üzərindən həyata keçirilməsi nəzərdə tutulur.
Postxronika.az xəbər verir ki, bu, Prezident İlham Əliyevin təsdiqlədiyi “Bir pəncərə” informasiya sistemi haqqında Əsasnamədə əksini tapıb.
Yeni sistem xarici ticarət sahəsində dövlət qurumları arasında məlumat mübadiləsinin sürətləndirilməsini, idarəetmənin təkmilləşdirilməsini və sahibkarlar üçün vahid elektron giriş imkanının yaradılmasını hədəfləyir. Platforma vasitəsilə idxal-ixrac, tranzit, nəqliyyat və logistika əməliyyatlarına dair sənədlər və məlumatlar elektron formada toplanacaq, mübadilə ediləcək və izləniləcək.
Sistemə yük-nəqliyyat sənədləri, gömrük bəyannamələri, lisenziya və icazələr, sığorta məlumatları, nəqliyyat vasitələrinin hərəkəti, sürücülər və beynəlxalq daşımalarla bağlı məlumatlar daxil ediləcək. Bu məlumatların bir hissəsi müvafiq dövlət informasiya sistemlərindən Elektron Hökumət İnformasiya Sistemi vasitəsilə əldə olunacaq.
İnformasiya sistemindən dövlət qurumları, hüquqi və fiziki şəxslər, eləcə də qeyri-rezidentlər istifadə edə biləcəklər. Elektron xidmətlər rəsmi internet portalı, mobil tətbiq, virtual köməkçi və digər kanallar vasitəsilə təqdim olunacaq.
Əsasnaməyə əsasən, sistem üzərindən göndərilən hər bir müraciətə əməliyyatların izlənilməsini təmin edən unikal kod veriləcək. Sistemdə yaradılan, əldə edilən və toplanan məlumatlar və elektron sənədlər Azərbaycan Respublikasının mülkiyyəti hesab olunacaq.