Səmanı fəth edən peşəkarlar: Azərbaycanın mülki aviasiya işçilərinin peşə bayramı günü

Azərbaycan mülki aviasiya sistemi bu gün regionun ən müasir və etibarlı hava nəqliyyatı şəbəkələrindən biri kimi tanınırsa, bu yol uzun illərin zəhməti, strateji baxış və fədakar insanların əməyi nəticəsində formalaşıb. Aviasiya ilə ilk tanışlıq dövrləri ölkədə hava nəqliyyatının hələ yeni bir anlayış olduğu illərə təsadüf edir. O zamanlar təyyarə səsi insanların həyatında nadir və qeyri-adi hadisə kimi qarşılanır, Bakıdan həyata keçirilən ilk reyslər isə ölkənin dünyaya açılan yeni pəncərəsinə çevrilirdi. Zaman keçdikcə bu sahə təkcə nəqliyyat vasitəsi deyil, həm də iqtisadiyyatın, diplomatiyanın və milli təhlükəsizliyin ayrılmaz hissəsinə çevrildi.

Müstəqillik illərindən isə Azərbaycan aviasiyası üçün yeni bir mərhələnin başlanğıcı oldu. Bu mərhələdə ümummilli lider Heydər Əliyevin uzaqgörən siyasəti aviasiya infrastrukturunun yenidən qurulmasında və beynəlxalq standartlara uyğunlaşdırılmasında həlledici rol oynadı. Onun rəhbərliyi ilə aviasiya ölkənin strateji sahələrindən biri kimi müəyyən edildi, hava limanlarının modernləşdirilməsi, beynəlxalq əlaqələrin genişləndirilməsi və təhlükəsizlik sistemlərinin gücləndirilməsi istiqamətində mühüm addımlar atıldı. Heydər Əliyev aviasiyanı təkcə nəqliyyat sahəsi deyil, Azərbaycanın dünya ilə inteqrasiyasının əsas körpüsü kimi görürdü.

Bu strateji xətt sonrakı illərdə cənab Prezident İlham Əliyev tərəfindən uğurla davam etdirildi və daha da genişləndirildi. Onun rəhbərliyi ilə Azərbaycanın hava limanları müasir beynəlxalq standartlara uyğun yenidən quruldu, regionda mühüm aviasiya mərkəzləri formalaşdırıldı və ölkənin hava nəqliyyatı şəbəkəsi sürətlə inkişaf etdi. Heydər Əliyev Beynəlxalq Hava Limanı və digər regional hava limanları Azərbaycanın qlobal aviasiya xəritəsində mövqeyini daha da gücləndirdi. Eyni zamanda yeni uçuş marşrutlarının açılması, “Azərbaycan Hava Yolları”nın beynəlxalq nüfuzunun artması və aviasiya təhlükəsizliyinin ən yüksək səviyyəyə çatdırılması ölkənin bu sahədəki uğurlarını daha da möhkəmləndirdi.

Lakin bu böyük sistemin ən vacib gücü onun görünməyən qəhrəmanları məhz bu sahədə çalışan peşəkar heyətdir. Bura pilotlar, dispetçerlər, mühəndislər, texniki heyət, xidmət və təhlükəsizlik əməkdaşları ilə yanaşı, aviaşirkətlərlə iş üzrə çalışan əməkdaşlardır ki, bu sistemin dayanıqlığını təmin edən əsas sütunlardandır. Onların işi birbaşa uçuşların planlaşdırılmasından, beynəlxalq tərəfdaşlıqların qurulmasından və əməliyyat koordinasiyasından keçir. Bu gün mənim üçündə əlamətdardır. Çünki bu sahədə 25 ildən artıq çalışan və oranın əməkdaşları sırasında mənim atamda var. Məhz buna görə mən aviasiyaçı övladı olmağımla hər zaman fəxr eləmişəm.

Mülki aviasiya yalnız texniki və iqtisadi sistem deyil, eyni zamanda yüksək məsuliyyət, dəqiqlik və insan həyatına birbaşa təsir edən bir sahədir. Hər uçuşun arxasında yüzlərlə koordinasiya olunmuş qərar, gecə-gündüz fasiləsiz iş və böyük bir komanda dayanır. Sərnişinlərin təhlükəsiz şəkildə mənzil başına çatması, ölkənin beynəlxalq əlaqələrinin genişlənməsi və iqtisadi inteqrasiyanın güclənməsi bu fədakarlığın nəticəsidir.

Mülki Aviasiya İşçilərinin Peşə Bayramı günü isə bu zəhmətin, bu məsuliyyətin və bu fədakarlığın rəsmi şəkildə dəyərləndirildiyi gündür. Bu gün Azərbaycan səmasını etibarlı edən, illərini bu sahəyə həsr edən bütün əməkdaşlara ehtiram ifadə olunur. Onların əməyi sayəsində Azərbaycan göyləri daim açıq, təhlükəsiz və etibarlı olaraq qalır və bu səmanın arxasında dayanan insanlar rəhbər işindən başlayaraq bütün heyət əsl qəhrəmanlardır. Gününüz mübarək!

Elmir Heydərli